05-09-47-02
جن لوگوں نے
کفر کیا، اور اللہ کے راستے سے روکا، ۔ ۔ ۔ ۔ ۔ ۔
دوسروں کو خدا کی راہ سے روکنے کی بہت سی صورتیں ہیں۔اس
کی ایک صورت یہ ہے کہ آدمی زبردستی کسی کو ایمان لانے سے روک دے ۔دوسری صورت یہ ہے
کہ وہ ایمان لانے والوں پر ایسا ظلم و ستم ڈھائے کہ ان کے
لئے ایمان پر قائم رہنا اور دوسروں کے لئے ایسے خوفناک حالات میں ایمان لانا مشکل
ہو جائے ۔تیسری صورت یہ ہے کہ وہ مختلف طریقوں سے دین اور اہل دین کے خلاف
لوگوں کو ورغلائے اور ایسے وسوسے دلوں میں ڈالے جس سے لوگ اس دین سے بدگمان ہو
جائیں ۔اس کے علاوہ ہر کافر اس معنے میں خدا کی راہ سے
روکنے والا ہے کہ وہ اپنی اولاد کو کفر کے طریقے پر پرورش کرتا ہے۔ اور پھر
اس کی آئندہ نسل کے لیے دین آبائی چھوڑ کر اسلام قبول کرنا مشکل ہو جاتا ہے ۔اسی طرح ہر کافر معاشرہ خدا کے راستے میں ایک سنگ گراں ہے۔
کیونکہ وہ اپنی تعلیم و تربیت سے، اپنے اجتماعی نظام اور رسم و رواج سے، اور اپنے
تعصبات سے دین کے پھیلنے میں شدید رکاوٹیں ڈالتا ہے۔
